Pawankalyan : తెలుగు సినీ ప్రేమికులు ఎంతగానో ఎదురుచూస్తున్న వార్త ఇప్పుడు బయటకు వచ్చింది. రాజకీయ బాధ్యతల వల్ల సినిమాలనుంచి కొంత విరామం తీసుకున్న పవర్ స్టార్ పవన్ కళ్యాణ్ త్వరలోనే సినిమా షూటింగ్‌లకు రంగం సిద్ధం చేస్తున్నారు. ఆంధ్రప్రదేశ్ ఎన్నికల్లో విజయకేతనం ఎగురవేసి డిప్యూటీ సియం గా బాధ్యతలు చేపట్టిన తర్వాత పవన్ కళ్యాణ్ తన సినిమా ప్రాజెక్ట్‌లను పక్కన పెట్టారు. ప్రజా సేవకే తన ప్రధాన లక్ష్యంగా పెట్టుకున్నారు.
తాజా సమాచారం ప్రకారం, పవన్ కళ్యాణ్ అక్టోబర్ నుంచి ‘ఓజీ’ సినిమా షూటింగ్‌కు డేట్లు ఇచ్చారు. ఈ సినిమా కోసం బల్క్ డేట్లు కేటాయించడం జరిగింది. నిర్మాత దానయ్య కూడా పవన్ కళ్యాణ్‌ని కలిసి ‘ఓజీ’ సినిమా పూర్తి చేయడానికి ఆయన సమ్మతించారని తెలిపారు. ‘ఓజీ’ తర్వాత పవన్ కళ్యాణ్ ‘ఉస్తాద్ భగత్ సింగ్’ సినిమాకు కూడా ఈ ఏడాది కొన్ని డేట్లు ఇవ్వబోతున్నారు. అయితే ముందు ‘ఓజీ’ సినిమాను పూర్తి చేసి, తర్వాత ‘ఉస్తాద్ భగత్ సింగ్’ సినిమాను ప్రారంభిస్తారు. దర్శకుడు హరీష్ శంకర్ కూడా తన తదుపరి సినిమాల ప్లానింగ్‌ను దీనికి అనుగుణంగా చేసుకుంటున్నారు.
పవన్ కళ్యాణ్ ఇంకా ‘హరి హర వీరమల్లు’ సినిమాను పూర్తి చేయాల్సి ఉంది. ‘ఓజీ’తో పాటు ‘వీరమల్లు’ సినిమాను పూర్తి చేస్తారా లేదా అనేది ఇంకా స్పష్టంగా తెలియదు. ‘ఓజీ’ సినిమా షూటింగ్‌కు ముందు పవన్ కళ్యాణ్ శారీరకంగా సిద్ధం కావాల్సి ఉంటుంది. అందుకే సెప్టెంబర్ నుంచి ఆయన కసరత్తులు మొదలు పెట్టే అవకాశాలు ఉన్నాయి. పవన్ కళ్యాణ్ త్వరలోనే సిల్వర్ స్క్రీన్‌పై కనిపించబోతున్నారనే వార్త పవన్ ఫ్యాన్స్‌ను ఉత్సాహంగా ఉంచుతోంది. పవన్ కళ్యాణ్ తన రాజకీయ బాధ్యతలతో పాటు సినిమా ఇండస్ట్రీకి కూడా అందించే విలువైన కంటెంట్‌ను ఎంతగానో ఆసక్తిగా ఎదురు చూస్తున్నారు.
