Saidharam Tej : విరూపాక్ష, బ్రో సినిమాల సక్సెస్ తరువాత, సాయి ధరమ్ తేజ్ తన కొత్త సినిమాతో ప్రేక్షకులను మెప్పించడానికి సిద్ధంగా ఉన్నాడు. ఈ చిత్రానికి రోహిత్ కేపీ దర్శకుడిగా పరిచయమవుతున్నారు. కె.నిరంజన్ రెడ్డి, చైతన్య రెడ్డి సంయుక్తంగా ఈ సినిమాను నిర్మిస్తున్నారు. ఇందులో ఐశ్వర్య లక్ష్మి కథానాయికగా నటిస్తోంది.
ఇటీవల సినిమా సెట్స్‌లోకి అడుగుపెట్టిన ఐశ్వర్య, ప్రస్తుతం హైదరాబాద్ పరిసర ప్రాంతాల్లో చిత్రీకరణలో పాల్గొంటోంది. సాయి తేజ్, ఐశ్వర్యలతో పాటు మిగిలిన ప్రధాన తారాగణంపై కీలక సన్నివేశాలను తెరకెక్కిస్తున్నారు. స్వాతంత్య్రానికి పూర్వం జరిగే ఆసక్తికర కథతో పీరియాడికల్ యాక్షన్ డ్రామాగా ఈ చిత్రం రూపొందుతోంది. ఈ సినిమా కోసం ‘సంబరాల ఏటి గట్టు’ అనే టైటిల్ పరిశీలనలో ఉంది.
