Pushpa 2 : ఆగస్టు 15న విడుదల కావాల్సిన ‘పుష్ప: ది రూల్’ చిత్రం డిసెంబర్ 6 వరకు వాయిదా పడింది. చిత్రీకరణలో జాప్యం కారణంగా ఈ నిర్ణయం తీసుకున్నట్లు చిత్రబృందం తెలిపింది. ప్రస్తుతం చిత్రీకరణ చివరి దశలో ఉంది. పతాక సన్నివేశాలు మరియు పాటల చిత్రీకరణ పూర్తి కావాల్సి ఉంది. ఈ పనులకు మరింత సమయం పడుతుందని అంచనా వేసి, వాయిదా నిర్ణయం తీసుకున్నారు.
అల్లు అర్జున్ కథానాయకుడిగా సుకుమార్ దర్శకత్వం వహిస్తున్న ఈ చిత్రం ‘పుష్ప: ది రైజ్’ కి సీక్వెల్. మైత్రీ మూవీ మేకర్స్ సంస్థ నిర్మిస్తున్న ఈ చిత్రంలో రష్మిక మందన్న హీరోయిన్‌గా నటిస్తుండగా, ఫహాద్ ఫాజిల్ ప్రతినాయకుడి పాత్రలో నటిస్తున్నారు. మొదటి భాగం డిసెంబర్ 17, 2021న విడుదలై బ్లాక్‌బస్టర్ విజయం సాధించింది. ఈ చిత్రం కూడా డిసెంబర్‌లోనే విడుదల కావడం గమనార్హం.
