ఆస్కార్ అవార్డు గ్రహీత ఏఆర్ రెహమాన్‌తో సినిమా చేయాలని ప్రతి దర్శకుడు, హీరో కలలు కంటారు. కానీ రెహమాన్ భారీ పారితోషికం డిమాండ్ చేస్తాడు, డేట్లు దొరకడం కష్టం. అందుకే చాలా మంది రెహమాన్ తో సినిమా పెట్టుకుని నెలల తరబడి వాయిదా వేసుకోవాల్సి వస్తుంది. రామ్ చరణ్, బుచ్చి బాబు కాంబోలో రూపొందబోతున్న సినిమాకు రెహమాన్ సంగీత దర్శకుడు అని తెలిసినప్పుడు చాలా మంది “ఎప్పటికి ఈ సినిమా అవుతుంది?” అని అనుకున్నారు. కానీ ఆశ్చర్యకరంగా, రెహమాన్ ఈ సినిమా కోసం ఇప్పటికే మూడు పాటలు రికార్డ్ చేశాడు.
బుచ్చిబాబు ఇంకా ఒక్క సన్నివేశం కూడా షూట్ చేయకపోయినా, రెహమాన్ నుంచి మూడు పాటలు తీసుకోవడం ఇండస్ట్రీలో చర్చనీయాంశమైంది. రెహమాన్ కెరీర్ లో ఇలా ఒక సినిమా షూటింగ్ ప్రారంభం కానప్పుడే మూడు పాటలు ఇవ్వడం ఇదే మొదటిసారి. ఏది ఏమైనా, రెహమాన్ సంగీతం ఈ సినిమాకు ప్రధాన ఆకర్షణ అవుతుంది. అదే సమయంలో, రెహమాన్ వల్ల సినిమా ఆలస్యం అవ్వకపోవచ్చు అని కూడా చర్చ మొదలైంది. గేమ్‌ చేంజర్ సినిమా కోసం చాలా టైమ్ తీసుకున్న చరణ్, ఇప్పుడు బుచ్చిబాబు సినిమా విషయంలో ఆలస్యం అవ్వకూడదు అని భావిస్తున్నాడట.
అందుకే రెహమాన్ తో పాటల రికార్డింగ్‌ ఇప్పటికే మొదలు పెట్టాడు. జూన్‌లో గేమ్‌ చేంజర్ షూటింగ్ పూర్తయిన వెంటనే బుచ్చి బాబు దర్శకత్వంలో చరణ్ కొత్త సినిమా షూటింగ్ లో జాయిన్ అవుతాడు. ఈ సినిమాలో రామ్ చరణ్ కి జోడీగా జాన్వీ కపూర్‌ నటించబోతోంది. స్పోర్ట్స్ బ్యాక్‌ డ్రాప్‌ తో రూపొందబోతున్న ఈ సినిమాపై భారీ అంచనాలు ఉన్నాయి. వచ్చే ఏడాది సమ్మర్‌లో సినిమా విడుదల అయ్యే అవకాశం ఉంది.
