సహాయం చేసిన వారికి కనీసం థాంక్స్ అయినా చెప్పడం మన సంస్కారం. హెల్ప్ చేసినవారు మననించి ఏమీ ఆశించకపోయినా.. వారి మేలు మనం మరిచిపోలేదన్న సంతృప్తి వారికి చాలు. అయితే ఆ థాంక్స్ ప్లేస్ లో అలాంటి వారికి ఓ కారు.. అందులోనూ ఖరీదైన లక్సరీ కార్ బహుమతిగా వస్తే వారి రియాక్షన్ ఎలా ఉంటుందంటారు? నిజంగా ఆశ్చర్యపరిచే అలాంటి బహుమతి డార్లింగ్ ప్రభాస్ నుంచే రావడం టాక్ ఆఫ్ ది టాలీవుడ్ అయింది.
ప్రస్తుతం మూడు సినిమాల్ని వరుసగా లైన్ లో పెట్టుకున్నాడు ప్రభాస్ . అందులో ఒకటి జిల్ రాధాకృష్ణ రాధేశ్యామ్ అన్న సంగతి తెలిసిందే. మరొకటి నాగ్ అశ్విన్ దర్శకత్వంలో సినిమా అయితే… ఇంకోటి ఓంరౌత్ ఆదిపురుష్ . ఈ మూడు సినిమాల్లోని పాత్రల కోసం ప్రభాస్ ప్రస్తుతం జిమ్ లో ఓ రేంజ్ లో కసరత్తులు చేసేస్తున్నాడు. ఆ జిమ్ ట్రైనర్ పేరు లక్ష్మణ్ రెడ్డి. అతడితో ప్రభాస్ చాలా ఆత్మీయంగా ఉంటాడు. తన కోసం బాగా కష్టపడుతోన్న ఆ ట్రైనర్ కి ప్రభాస్ ఒక గిఫ్ట్ ఇవ్వాలనుకున్నాడు. అనుకోవడమే తరువాయి.. వెంటనే ఆ ట్రైనర్ ఇంటి గుమ్మం ముందు వాలిపోయింది ఓ కారు. అది అలాంటిలాంటి కారు కాదు మరి. లక్షల ఖరీదు చేసే రేంజ్ రోవర్ కారు. తన చుట్టూ ఉన్న‌వారికి ప్రభాస్ ఇలా గిఫ్ట్ ఇవ్వడం ఇదేం తొలిసారేం కాదు. గ‌తంలోనూ డార్లింగ్ ప‌లువురికి బ‌హుమ‌తులు ఇచ్చి స‌ర్‌ప్రైజ్ చేశారు. ప్రభాస్‌లో ఉన్న ఈ కోణాన్ని చూసి కూడా ఆయ‌న‌కు ఫ్యాన్ ఫాలోయింగ్ మ‌రింత పెరుగుతోంది.
