Bollywood : రాజ్‌కుమార్ హిరాణీ దర్శకత్వంలో తెరకెక్కిన మున్నా భాయ్ సిరీస్ భారతీయ సినీ ప్రేక్షకుల హృదయాలను దోచుకున్న విషయం తెలిసిందే. సంజయ్ దత్ మున్నా భాయ్‌గా, అర్షద్ వార్సీ సర్క్యూట్‌గా నటించిన ఈ సిరీస్ తన కామెడీతో, సామాజిక సందేశంతో హృద్యమైన కథలతో ప్రేక్షకులను అలరించింది.
మొదటి రెండు భాగాలు సూపర్ హిట్ కావడంతో, అభిమానులు మూడవ భాగం కోసం ఎంతగానో ఎదురు చూస్తున్నారు. మున్నా భాయ్ అండ్ సర్క్యూట్ కలిసి చేసే హంగామాను మరోసారి చూడాలనే కోరిక ప్రతి ఒక్కరిలో ఉంది. దర్శకుడు రాజ్‌కుమార్ హిరాణీ, మున్నా భాయ్ 3 ని రూపొందించడం తన ప్రధాన ప్రాధాన్యత అని స్పష్టంగా చెప్పడం అభిమానుల ఉత్సాహానికి మరింత ఊపునిచ్చింది. హిరాణీ దగ్గర మున్నా భాయ్ కోసం ఐదు సగం పూర్తయిన స్క్రిప్ట్‌లు ఉన్నాయని తెలియడం అభిమానుల ఆశలను మరింత పెంచింది.
సంజయ్ దత్ కూడా మరో మున్నా భాయ్ సినిమా చేయాలని కోరుకుంటున్నాడు. సీక్వెల్స్‌లో రాబోయేది ఎప్పుడూ గత చిత్రాల కంటే మెరుగ్గా ఉండాలనే హిరాణీ ఆలోచన అభిమానులను ఆకట్టుకుంది. తెలుగులో మున్నా భాయ్ సిరీస్ శంకర్ దాదా ఎంబీబీఎస్ , శంకర్ దాదా జిందాబాద్ పేర్లతో రీమేక్ అయింది. ఈ రీమేక్‌లు కూడా విజయం సాధించడంతో, మున్నా భాయ్ 3 తెలుగులో రీమేక్ అయితే మెగాస్టార్ చిరంజీవి శంకర్ దాదాగా మళ్ళీ ప్రేక్షకుల ముందుకు వస్తారేమో అనే చర్చ జరుగుతోంది.
