కమెడియన్ యోగిబాబు .. కోలీవుడ్ లో బిజీ స్టార్ కమెడియన్ అన్నసంగతి తెలిసిందే. కొన్ని డబ్బింగ్ సినిమాలతో అతడు తెలుగువారికి కూడా సుపరిచితుడే. విజయ్, సూర్య, అజిత్ , ధనుష్ లాంటి స్టార్ హీరోల సినిమాల్లో అతగాడు నటిస్తూ తమిళ నాట కమెడియన్ గా దూసుకుపోతున్నాడు. ప్రస్తుతం సంతానం, వడివేలు, సూరి లాంటి కమెడియన్స్ ఉన్నా సరే తన బాణీలో తాను సినిమాలు చేసుకుంటూ సత్తా చాటుకుంటున్నాడు. ఇక మేటర్లోకెళితే.. తాజాగా అతగాడు తమిళనాడులోని మురుగప్పన్ గుడిలో ఎలాంటి హడావిడిలేకుండా సైలైంట్ గా పెళ్ళిచేసుకున్నాడు.
వధువు పేరు మంజు. పెద్దలు చూసిన సంబంధాన్నే ఎలాంటి ఆర్భాటం లేకుండా అతి కొద్ది మంది ఆహ్వానితుల సమక్షంలో యోగిబాబు పెళ్ళి చేసుకోవడం కోలీవుడ్ లో హాట్ టాపిక్ గా మారింది. సోషల్ మీడియాలో గానీ.. మీడియాకి కానీ ఎలాంటి సమాచారం ఇవ్వక పోవడంతో వివాహం రహస్యం గా జరిగిందని నెటిజనులు కామెంట్ల తో వేడెక్కిస్తున్నారు. ప్రస్తుతం యోగి పెళ్లి కొడుకు గెటప్ లో ఉన్న ఫోటోలు సోషల్ మీడియాలో వైరల్ గా మారాయి.
