‘రాంఝానా’ చిత్రంతో తమిళ స్టార్ హీరో ధనుష్ బాలీవుడ్ లో ఎంట్రీ ఇచ్చిన సంగతి తెలిసిందే. తొలి చిత్రంతోనే ప్రేక్షకుల మనసు దోచిన ధనుష్ .. ఆ తర్వాత షమితాబ్ గా అమితాబ్ తో నటించాడు. ఆ మూవీ అంతగా మ్యాజిక్ చేయలేకపోయినప్పటికీ అతగాడి నటనకి మంచి అప్లాజ్ వచ్చింది. ఇప్పుడు ధనుష్ ముచ్చటగా మూడోసారి బాలీవుడ్ లో హీరోగా నటించబోతున్నాడు. సినిమా పేరు ‘అత్రంగి రే’. ధనుష్ ను బాలీవుడ్ కు పరిచయం చేసిన ఆనంద్ ఎల్.రాయే దీనికి దర్శకుడు. ఇక ఇందులో ధనుష్ సరసన కథానాయికగా నటిస్తోన్నది మరోవరో కాదు, సైఫ్ ఆలీఖాన్ గారాల పట్టి.. సారా ఆలీఖాన్.
ఈ సినిమాకు సంబంధించిన విశేషాల్ని అక్షయ్ కుమార్ ట్విట్టర్ లో తెలియచేశాడు. అంతేకాదు దీనికి సంబంధించిన లుక్ ను విడుదల చేశాడు. సారా ఆలీఖాన్ ను అక్షయ్ కుమార్, ధనుష్ ముద్దాడుతోన్న ఆ పోస్టర్ సోషల్ మీడియాలో వైరల్ అయింది. ఇక అత్రంగి రే లో అక్షయ్ కుమార్ ఒక ప్రత్యేక పాత్ర పోషిస్తున్నట్టు కూడా చెప్పాడు. ఆనంద్ చెప్పిన కథకు ముచ్చటపడిన అక్షయ్ కుమార్ ఇందులోని ప్రత్యేక పాత్ర పోషించడానికి ముందుకొచ్చాడట. ఇక ఈ సినిమాకి మ్యూజిక్ సెన్సేషన్ ఏఆర్ రహమాన్ సంగీతం అందిస్తున్నాడు. త్వరలోనే సెట్స్ మీదకు వెళ్ళనున్న ‘అత్రంగి రే’ చిత్రం ధనుష్ కు ఏ స్థాయిలో పేరు తెస్తుందో చూడాలి.
