మోహన్ బాబు నటవారసుడు మంచు మనోజ్ కొంత కాలం గ్యాప్ తర్వాత .. ఓ వెరైటీ కాన్సెప్ట్ తో కమ్ బ్యాక్ అవుతున్న సంగతి తెలిసిందే. ‘అహం బ్రహ్మస్మి’ టైటిల్ ను ఖాయం చేసుకున్న ఈ సినిమాతో శ్రీకాంత్ రెడ్డి అనే కుర్రోడు దర్శకుడిగా పరిచయం అవుతున్నాడు. తన సొంత బ్యానర్ లో పాన్ ఇండియా లెవెల్లో బహుభాషల్లో ఈ చిత్రాన్ని నిర్మిస్తున్నాడు మనోజ్ . మార్చ్ 6న ప్రారంభం కానున్న ఈ సినిమా ఆ వెంటనే రెగ్యులర్ షూటింగ్ కూ వెళ్ళనుంది. ఈ నేపథ్యంలో ఈ మూవీకి సంబంధించిన గ్రౌండ్ వర్క్ యుద్ధ ప్రాతిపదికన జరుగుతోంది. ఇదిలా ఉంటే.. మనోజ్ ఇందులో కథానాయికగా ఒక తమిళ యాంకర్ ను పరిచయం చేయనుండడం ఆసక్తి రేపుతోంది.
తమిళ టీవీ ఛానల్స్ లో పలు విజయవంతమైన షోస్ చేసిన ప్రముఖ యాంకర్ ప్రియా భవానీ శంకర్. అమ్మడు ప్రస్తుతం కమల్ హాసన్ ,కాజల్ ‘ఇండియన్ 2’ లో ఒక ముఖ్య పాత్ర పోషిస్తోంది. ఇంకా తమిళంలో మరికొన్నిచిత్రాల్లో కథానాయికగా నటిస్తోంది. అలాంటి ఈ సుందరిని మనోజ్ .. ‘అహం బ్రహ్మస్మి’ చిత్రం కోసం ఏరికోరి హీరోయిన్ గా ఎంపికచేయడం విశేషంగా మారింది. మరి ఈ అమ్మాయి మనోజ్ సినిమాతోనే పరిచయం అయిన తమన్నా లాగానే సౌత్ లో స్టార్ హీరోయిన్ అవుతుందేమో చూద్దాం.
