సూపర్ స్టార్ కృష్ణ నటించిన యాక్షన్ చిత్రాల్లో అత్యధిక ప్రేక్షకాదరణ పొందినది ‘దొంగలకు దొంగ’. యాక్షన్ చిత్రాలు తెరకెక్కించడంలో దిట్ట అయిన కె.యస్.ఆర్. దాసు ఈ సినిమాని తనదైన శైలిలో తెరకెక్కించారు. పి.బాజ్జీ , జి.సాంబశివరావు సంయుక్తంగా నిర్మించిన ఈ సినిమా 1977లో విడుదలైంది. ఇందులో మోహన్ బాబు మరో హీరోలాంటి పాత్రను పోషించడం విశేషం. జయప్రద హీరోయిన్ గా నటించిన ఈ సినిమాలో ఇంకా.. నాగభూషణం, పి.ఆర్,వరలక్ష్మి, పండరీబాయ్ తదితరులు ఇతర ముఖ్యపాత్రలు పోషించారు. ఇక చిన్నప్పటి కృష్ణ గా రమేష్ బాబు కనిపించడం విశేషం. సత్యం సంగీత సారధ్యంలోని పాటలు మెప్పిస్తాయి. ముఖ్యంగా పోరా బాబూ పో పాట.. ఈ సినిమాకి సిగ్నేచర్ సాంగ్ గా నిలిచిపోతుంది.
చిన్నప్పుడే తల్లిదండ్రుల్ని పోగొట్టుకొని .. విడిపోయిన ఇద్దరు అన్నదమ్ములు .. పెద్ద క్రిమినల్స్ గా మారతారు. ఆ ఇద్దరూ అన్నదమ్మలమని ఒకరికొకరికి తెలియక బద్ధశత్రువులుగా మారతారు. ఒకపోలీసాఫీసర్ అందులో ఒకరి గ్యాంగ్ లోకి అండర్ కవర్ కాప్ గా చేరతాడు. వారి నాయకుడి రహస్యాలు తెలుసుకుంటాడు. చివరికి ఆ అన్నదమ్ములిద్దరూ ఆ క్రిమినల్స్ ను మట్టుబెట్టి.. ఎలా కలుసుకుంటారు అన్నదే మిగతా కథ. నిజానికి ఈ సినిమా ఫకీరా బాలీవుడ్ మూవీకి రీమేక్ వెర్షన్. శశికపూర్, డ్యానీ డెంజోంగా ముఖ్యపాత్రలు పోషించిన ఆ సినిమాకి సి.పి.దీక్షిత్ దర్శకుడు.
