ఈ సంక్రాంతికి టాలీవుడ్ లో విడుదలై… ఇండస్ట్రీ హిట్ కొట్టింది ‘ అల వైకుంఠపురములో’చిత్రం. అల్లు అర్జున్ స్టైలిష్ పెర్ఫార్మెన్స్, త్రివిక్రమ్ మాటల గారడితో ఈ సినిమా విమర్శకుల ప్రశంసలు సైతం అందుకుంది. ఇదే సినిమా మలయాళంలో ‘అంగు.. వైకుంఠపురత్తు’ గా అదే రోజు విడుదలైన సంగతి తెలిసిందే. జయరామ్, టబు, సముద్రఖని, సచిన్ ఖేడ్కర్ లాంటి పరభాషా నటీ,నటులు మలయాళ ప్రేక్షకులకు సుపరిచితం కాబట్టి.. ఈ మూవీ అక్కడ హిట్ టాకే తెచ్చుకుంది . కానీ ఇతర మలయాళ స్ట్రైట్ సినిమాలు అదే సమయంలో విడుదలవడం వల్ల ‘అంగు… వైకుంఠపురత్తు’ మూవీని కేరళ లో ఎక్కువ రోజులు థియేటర్స్ లో ఉంచకుండానే తీసేయాల్సి వచ్చింది.
కానీ త్వరలో ‘అంగు వైకుంఠపురత్తు’ చిత్రాన్ని అల్లు అర్జున్ అభిమానుల కోరిక మేరకు రీరిలీజ్ చేయబోతున్నారు. దాదాపు 150 థియేటర్స్ లో ఈ సినిమా తిరిగి రిలీజ్ కానుంది. బన్నీకి అక్కడ విపరీతమైన ఫ్యాన్ ఫాలోయింగ్ ఉంది. అందుకే పబ్లిక్ డిమాండ్ మేరకు అక్కడ మరోసారి విడుదల కాబోతోంది. మలయాళ సినిమా హిస్టరీలో డబ్బింగ్ సినిమాల్లో ఈ మాదిరి రిరిలీజ్ అయిన సినిమానే లేదట. ఆ రకంగా కూడా మన స్టైలిష్ స్టార్ అక్కడ మ్యాజిక్ చేస్తున్నాడన్నమాట. మరి రీరిలీజ్ లో ఈ సినిమా ఏ స్థాయిలో కలెక్షన్స్ తెచ్చుకుంటుందో చూడాలి.
