‘ఇస్మార్ట్ శంకర్’ ఘనవిజయంతో రెట్టింపు ఎనర్జీతో.. తదుపరి చిత్రం ‘రెడ్’ సినిమా చేస్తున్నాడు యంగ్ హీరో రామ్. కిశోర్ తిరుమల దర్శకత్వంలో తెరకెక్కుతోన్న ఈ రొమాంటిక్ యాక్షన్ మూవీ కోసం తన కెరీర్ లో మొదటిసారిగా ద్విపాత్రాభినయం చేస్తున్నాడు రామ్. తమిళ ‘తడం’ ఆధారంగా రూపొందుతున్న ఈ సినిమా ప్రస్తుతం ఇటలీలో రెండు పాటల చిత్రీకరణ జరుపుకుంటోంది. నివేదా పెతురాజ్, మాళవికా శర్మ, అమృతా అయ్యర్ లాంటి అందమైన కథానాయికలతో రామ్ ఇటలీలోని అందమైన ప్రదేశాల్లో ఆడిపాడుతున్నాడు.
ఇటలీలోని టస్కాన్ టౌన్ లో కార్నివాల్ ఆఫ్ వియారెగియో లొకేషన్ లో షూటింగ్ జరుపుకుంటోన్న మొదటి తెలుగు చిత్రంగా ‘రెడ్’ చిత్రం విశేషాన్ని సంతరించుకుంది. ఇంకా ఫ్రోరెన్స్, టస్కాన్ , డోలమైటీస్ లోని ఆహ్లాదకరమైన వాతావరణంలో పాటల చిత్రీకరణ జరుపుకోవడం ఈ సినిమా ప్రత్యేకత. ఈ నెల 20వరకూ అక్కడ ఈ షెడ్యూల్ చిత్రీకరణ జరుపుకోనుంది. మణిశర్మ సంగీతం అందిస్తోన్న ‘రెడ్’ మూవీ కి సంబంధించిన మూడో పాటను హైద్రాబాద్ లో చిత్రీకరణ జరుపుకోనుంది. తమిళంలో అరుణ్ విజయ్ పోషించిన రెండు వైవిధ్యమైన పాత్రల్ని .. ‘రెడ్’ లో రామ్ ఏ స్థాయిలో రక్తి కట్టిస్తాడో చూడాలి.
