ఈ ఏడాది సంక్రాంతికి మహేశ్ బాబు ‘సరిలేరు నీకెవ్వరు’, అల్లు అర్జున్ ‘అల వైకుంఠపురములో’ చిత్రాలు రెండూ.. పోటాపోటీగా తలపడి .. భారీ కలెక్షన్స్ కొల్లగొట్టిన సంగతి తెలిసిందే. ఆ రెండు సినిమాల ఘనవిజయంతో అభిమానులు అదనంగా మరో పండుగను కూడా జరుపుకున్నారు. ఇక వచ్చే సంక్రాంతికి ఈ పోటీ కనీవినీ ఎరుగని రీతిలో మరింత తీవ్ర స్థాయిలో ఉండబోతోందని తెలుస్తోంది. దానికి ఒక కారణం రాజమౌళి క్రేజీ మల్టీస్టారర్ ‘ఆర్.ఆర్.ఆర్’ అని ప్రత్యేకించి చెప్పాల్సిన అవసరం లేదు.
నిన్ననే ఈ సినిమాకు సంబంధించిన కొత్త రిలీజ్ డేట్ ను అనౌన్స్ చేశారు. 2021 సంక్రాంతి కానుకగా ‘ఆర్.ఆర్.ఆర్’ సినిమాను జనవరి 8న విడుదల చేయబోతున్నట్టు ప్రత్యేకించి ఒక పోస్టర్ ను విడుదల చేసి మరీ చెప్పారు మేకర్స్. బాహుబలి సిరీస్ తర్వాత రాజమౌళి దర్శకత్వంలో తెరకెక్కిన కారణంగా ఈ సినిమాకు ప్రపంచ వ్యాప్తంగా భారీ అంచనాలున్నాయి. అందులోనూ ప్యాన్ ఇండియా మూవీ కావడంతో.. దీనికి సోలో రిలీజ్ తప్పదు. అయితే వేరే సీజన్ అయితే.. రాజమౌళి సినిమాకి ఎదురెళ్ళే సాహసం మరెవరూ చేయకపోవచ్చు కానీ.. సంక్రాంతి సీజన్ కాబట్టి.. పెద్ద హీరోలెవరూ వదులుకోవడడానికి సిద్ధంగా లేరట. 2021 సంక్రాంతి బరిలోకి ఆర్.ఆర్.ఆర్ కు పోటీగా పవన్ కళ్యాణ్, క్రిష్ పీరియాడికల్ మూవీ, మహేశ్ బాబు , వంశీ పైడిపల్లి కాంబో మూవీ తమ బెర్తుల్ని ఖాయం చేసుకున్నాయట. అయితే వీటిలో ముందుగా రీలీజ్ అయ్యేది రాజమౌళి ‘ఆర్.ఆర్.ఆర్’ మూవీ కాబట్టి.. దానికి నాలుగైదు రోజుల తేడాతో పవన్ , మహేశ్ చిత్రాలు రావచ్చని సమాచారం. మరి ఈ లెక్కన వచ్చే సంక్రాంతికి టాలీవుడ్ బాక్సాఫీస్ దబిడిదిబిడే అన్నమాట.
