మెగాస్టార్ చిరంజీవి కెరీర్ లో ప్రత్యేకమైన చిత్రం ‘హిట్లర్’ . అంతకు ముందు చేసిన సినిమాలన్నీ పరాజయం పాలవడంతో .. 1996 లో చిరు మంచి కథలు దొరక్క ఏ సినిమాలోనూ నటించలేదు. అయితే 1997 లో చిరంజీవి ‘హిట్లర్’ చిత్రం సూపర్ హిట్టుతో తిరిగి ఫామ్ లోకొచ్చాడు. ముత్యాలసుబ్బయ్య దర్శకత్వంలో తెరకెక్కిన ఈ ఫ్యామిలీ సెంటిమెంట్ మూవీ టాలీవుడ్ ప్రేక్షకుల మనసుకు హత్తుకుంది. రాజేంద్రప్రసాద్, రంభ, దాసరినారాయణరావు, రామిరెడ్డి, కిట్టు, ప్రకాశ్ రాజ్, బాబూమోహన్, బ్రహ్మానందం, కల్పనారాయ్, సుధాకర్, నారాయణరావు, మోహిని, అశ్విని, మీనాకుమారి, తదితరులు నటించిన ఈ సినిమా నిజానికి మలయాళంలో సిద్ధిక్ దర్శకత్వంలో వచ్చిన ‘హిట్లర్’ చిత్రానికి రీమేక్. మమ్ముట్టి హీరోగా నటించిన ఈ సినిమా మాలీవుడ్ రికార్డుల్ని తిరగరాసింది. ఒక అన్న, ఏడుగురు చెల్లెళ్లు .. వారి మధ్య అనురాగాప్యాయతల సమాహారం ‘హిట్లర్’ చిత్రం. కోటి సంగీతం అందించిన ఈ సినిమాలోని పాటలు .. ఇప్పటికీ అభిమానుల్ని ఉర్రూతలూగిస్తునే ఉన్నాయి.
