పవర్ స్టార్ పవన్ కళ్యాణ్ కెరీర్ లో హైయస్ట్ గ్రాస్ కలెక్ట్ చేసిన చిత్రాల్లో ‘ఖుషి’ ఒకటి. ఏప్రిల్ 27, 2001 లో విడుదలైన ఈ సినిమా టాలీవుడ్ బాక్సాఫీస్ రికార్డులు బద్దలు కొట్టింది. ఒకే హాస్పిటల్ లో ఒకేరోజు పుట్టిన ఒక అబ్బాయి , అమ్మాయి పెరిగి పెద్దవారైన తర్వాత ప్రేమలో పడే కథతో యస్.జే.సూర్య ఈ సినిమాని తెరకెక్కించాడు. భూమిక కథానాయికగా నటించిన ఈ మూవీలో విజయ్ కుమార్, సుధాకర్, రాజన్ పి దేవ్ , వేణుమాధవ్, శివాజీ తదితరులు ఇతర ముఖ్యపాత్రలు పోషించారు. నిజానికి ఈ సినిమా యస్.జే సూర్య దర్శకత్వంలోనే దళపతి విజయ్, జ్యోతిక జంటగా నటించిన ‘ఖుషీ’ తమిళ చిత్రానికి రీమేక్. ఈ మూవీ కూడా తమిళనాట రికార్డు కలెక్షన్స్ కురిపించింది. రెండు సినిమాల్లోనూ మణిశర్మ అందించిన సంగీతం అప్పటి యూత్ ను భలేగా అలరించింది. పవర్ స్టార్ మేనరిజమ్స్, డైలాగ్స్, ఫైట్స్, డ్యాన్స్ అభిమానుల్ని ఉర్రూత లూగించాయి. ఇదే సినిమా ఆ తర్వాత బాలీవుడ్ లో ఖుషీ (ఫర్తీన్ ఖాన్, కరీనాకపూర్ ) గానూ, కన్నడలో ఎనో ఒందర (గణేశ్ , ప్రియమణి ) గానూ రీమేక్ అయి ఆయా భాషల్లోనూ సూపర్ హిట్టయింది.
