మూడేళ్ళు గ్యాప్ తర్వాత మంచు మనోజ్ .. ‘అహం బ్రహ్మస్మి’ చిత్రంతో కమ్ బ్యాక్ అవుతోన్న సంగతి తెలిసిందే. సొంత నిర్మాణ సంస్థ యమ్.యమ్.ఆర్ట్స్ బ్యానర్ పై తల్లి మంచు నిర్మలా దేవి సమర్పణలో ఈ సినిమా రూపొందనుంది. కొత్త కుర్రోడు శ్రీకాంత్ యన్. రెడ్డిని దర్శకుడిగా పరిచయం చేస్తూ.. మార్చ్ 6న ఈ సినిమాను లాంఛ్ చేయనున్నాడు మనోజ్. డివోషనల్ కాన్సెప్ట్ తో కొత్త తరహా ట్రీట్ మెంట్ తో తెరకెక్కనున్న ఈ సినిమా లో మంచు మనోజ్ ఒక షాకింగ్ కేరక్టర్ చేయబోతున్నట్టు ఫిల్మ్ నగర్ టాక్.
తాజా సమాచారం ప్రకారం ‘అహం బ్రహ్మస్మి’ చిత్రంలో మంచు మనోజ్ అఘోరా గా నటించబోతున్నాడట. ఆ పాత్రకు సంబంధించిన అధికారిక ప్రకటన త్వరలో రానుందట. దీంతో టాలీవుడ్ లో అఘోరాగా నటించే మొట్టమొదటి హీరో మంచు మనోజే కానున్నాడని చెప్పుకుంటున్నారు. మరో వైపు బోయపాటి చిత్రంలో కూడా బాలకృష్ణ అఘోరాగా నటిస్తున్నాడని వార్తలొస్తున్న సంగతి తెలిసిందే. ఆ సినిమా ఇంకా సెట్స్ మీదకు వెళ్ళలేదు. వెళ్లినా ఆ సినిమా విడుదలవడానికి చాలా టైమ్ పట్టొచ్చు. దాని కన్నా ముందే ‘అహం బ్రహ్మస్మి’ చిత్రం విడుదల కానుందని టాక్. గతంలో తమిళ హీరో ఆర్య ‘నేను దేవుణ్ణి’ చిత్రంలో ‘అఘోరా’గా ఫుల్ లెంగ్త్ రోల్ ప్లే చేసి అదరగొట్టిన సంగతి తెలిసిందే. అలాగే నాజర్ (యన్టీఆర్ ‘శక్తి’ ), నెపోలియన్ (‘రాయలసీమ రామన్న చౌదరి’), సోనూ సూద్ (‘అరుంధతి’ ), పృధ్వి (‘శ్రీఆంజనేయం’) లాంటి నటులు సైతం అఘోరాగా నటించి మెప్పించారు. మరి హీరో మంచు మనోజ్ అఘోరా పాత్ర ఎంత పవర్ ఫుల్ గా పోషించి పేరు తెచ్చుకుంటాడో చూడాలి.
